Visa និង Thunes ពង្រីកវិសាលភាពរបស់សេវាផ្ទេរប្រាក់ Visa Direct រហូតដល់ ១.៥ ពាន់លាន កាបូបឌីជីថល

12/02/2022

ដៃគូសហការផ្តល់ដំណោះស្រាយការទូទាត់អាជីវកម្មក្រៅប្រទេស តាមរយៈការផ្ញើប្រាក់ទៅកាន់កាបូបឌីជីថល (cross-border send-to-wallet ) ដល់អ្នកប្រើប្រាស់បុគ្គល និងសម្រាប់អាជីវកម្មខ្នាតតូច នឹងមធ្យម (SMBs)

 

ក្រុមហ៊ុន Visa (NYSE: V) កំពុងចាប់ដៃគូជាមួយក្រុមហ៊ុន Thunes ដើម្បីធ្វើឲ្យការផ្ទេរប្រាក់ក្រៅប្រទេសកាន់តែមានភាពងាយស្រួលសម្រាប់បុគ្គល និងអាជីវកម្មខ្នាតតូច។ តាមរយៈភាពជាដៃគូនេះ អតិថិជនដែលមាន Visa​ កាត អាចផ្ញើប្រាក់ទៅកាន់កាបូបឌីជីថលប្រមាណ ៧៨ ប្រភេទ និងគណនីចំនួន ១.៥ ពាន់លាន នៅទូទាំង ៤៤ ប្រទេស និងតំបន់។ ភាពជាដៃគូនេះ នឹងពង្រីកវិសាលភាពរបស់ Visa Direct រហូតដល់ជិត ៧ ពាន់លាន ឧបករណ៍ ក្នុងនោះរួមមាន កាត ច្រើនជាង ៣ ពាន់លាន គណនី ជាង ២ ពាន់លាន និងកាបូបឌីជីថលចំនួន ១.៥ ពាន់លាន ផងដែរ។

តម្រូវទៅលើសេវាទូទាត់ទៅក្រៅប្រទេសដែលគួរឲ្យទុកចិត្តបាន កំពុងតែមានការកើនឡើងពីសំណាក់ប្រជាជន  កម្ពុជា។ គិតត្រឹមរយៈពេល ៩ ខែដំបូងនៃឆ្នាំ ២០២២ ទំហំពាណិជ្ជកម្មក្រៅប្រទេសរបស់កម្ពុជា បានឈានដល់ ៤១ ពាន់លានដុល្លារ គឺកើនឡើង ១៨ ភាគរយ ពី ៣៤,៧៦ ពាន់លានដុល្លារ ក្នុងរយៈពេលដូចគ្នាកាលពីឆ្នាំមុន¹។ ប្រជាជនកម្ពុជាជាច្រើនដែលកំពុងបម្រើការងារនៅក្រៅប្រទេស និងជាអ្នកផ្គត់ផ្គង់ដល់ជីវភាពក្រុមគ្រួសាររបស់ពួកគេ ខណៈគ្រួសារមួយចំនួនក៏កំពុងផ្តល់ហិរញ្ញប្បទានដល់ការសិក្សារបស់កូនៗរបស់ពួកគេនៅក្រៅប្រទេសផងដែរ។ ទន្ទឹមនឹងនោះដែរ យើងក៏សង្កេតឃើញការកើនឡើងនៃតម្រូវការសម្រាប់ព្រឹត្តិការណ៍ពិសេសៗ ដូចជាពិធីមង្គលការ និងការសម្រាកលម្ហែនៅក្រៅប្រទេស ដែលមានទំហំប្រតិបត្តិការផ្ញើប្រាក់²  ផ្ទាល់ខ្លួនចំនួន ១.៥ ពាន់លានដុល្លារ    អាមេរិក ត្រូវបានទូទាត់ និងទទួល ដោយប្រជាជនកម្ពុជានៅឆ្នាំ ២០២០។

ផ្នែកមួយនៃការកើនឡើងរបស់សេវាផ្ញើប្រាក់ក្នុងចំណោមអតិថិជនកម្ពុជា ត្រូវបានគេរកឃើញនៅតាមកាបូប   អេឡិចត្រូនិក និងកាតធនាគារ ដែលវាជាវិធីសាស្រ្តដ៏ទំនើបមួយដែលអ្នកប្រើប្រាស់ទទួលយក។ យោងតាមការសិក្សា³របស់ក្រុមហ៊ុន Visa ស្តីពីឥរិយាបថទូទាត់ប្រាក់របស់អតិថិជនឆ្នាំ២០២១ បានឱ្យដឹងថា ៤០ភាគរយនៃអ្នកប្រើប្រាស់ ជ្រើសរើសការប្រើប្រាស់កាបូបអេឡិចត្រូនិច និងកាត ហើយប្រមាណ​ ២៥ ភាគរយ រំពឹងថាការប្រើប្រាស់នឹងញឹកញាប់ជាងមុន សម្រាប់ការផ្ញើប្រាក់ និងការទូទាត់វិក្កយបត្ររបស់ពួកគេ។

អ្នកស្រី អ៊ីវ៉ាណា ត្រាហ្ស៊ីនី (Ivana Tranchini) នាយិកាគ្រប់គ្រងក្រុមហ៊ុន Visa ប្រចាំប្រទេសកម្ពុជា បានមានប្រសាសន៍ថា៖ “ភាពជាដៃគូនេះនឹងជួយសម្រួលដល់ការបោះជំហានទៅមុខរបស់ Visa ក្នុងការជួយជុំរញឲ្យសង្គមកម្ពុជាដើរចេញឆ្ងាយពីការប្រើប្រាស់សាច់ប្រាក់សុទ្ធ ហើយឆ្ពោះទៅរកការទូទាត់ឌីជីថលប្រកបដោយសុវត្ថិភាព។ នៅពេលដែលពិភពលោកបន្តផ្សារភ្ជាប់ទំនាក់ទំនងគ្នាកាន់ជិតស្និទ្ធ អ្នកផ្ញើ និងអ្នកទទួល នឹងលែងត្រូវការបំលាស់ទីសាច់ប្រាក់ដោយផ្ទាល់។ ចំនុចនេះហើយ ដែលនឹងផ្តល់ឱ្យអ្នកប្រើនូវសន្តិភាពផ្លូវចិត្ត ទទួលបានការទូទាត់កាន់តែមានភាពងាយស្រួល និងតម្លាភាពហិរញ្ញវត្ថុផ្ទាល់ខ្លួន ។ ជាងនេះទៀត ភាពជាដៃគូនេះ នឹងនាំមកជូនប្រជាជនកម្ពុជានូវឱកាសសកល តាមរយៈផលិតផល និងសេវាកម្មប្រកបដោយភាពច្នៃប្រឌិតបំផុត” ។

នៅក្នុងទីផ្សារដែលកំពុងអភិវឌ្ឍ កាបូបឌីជីថល (digital wallets) កំពុងទទួលបានការចាប់អារម្មណ៍យ៉ាងខ្លាំង ហើយវាបានក្លាយជាមធ្យោបាយទីមួយក្នុងការបញ្ជ្រៀបប្រព័ន្ធហិរញ្ញវត្ថុ ទៅកាន់អតិថិជនដែលមិនមានគណនី ធនាគារ។ អ្នកប្រើប្រាស់ មិនតម្រូវឱ្យមានកាត ឬគណនី ដើម្បីបញ្ចូល ឬទទួលប្រាក់ដោយផ្ទាល់ទៅក្នុងកាបូបឌីជី ថលរបស់ពួកគេនោះទេ នេះជាមូលហេតុដែលនាំឲ្យកាបូបឌីជីថលមានសក្តានុពលក្នុងការធ្វើបរិយាបន្នហិរញ្ញវត្ថុ និងផ្តល់ឱកាសឱ្យប្រជាជនដែលមិនទាន់ទទួលបានសេវាហិរញ្ញវត្ថុ អាចចូលប្រើប្រាស់ផលិតផលហិរញ្ញវត្ថុបាន។​ ហើយទាំងអស់នោះបានជះឥទ្ធិពលយ៉ាងខ្លាំងដល់របៀបនៃការរស់នៅ និងការងាររបស់ពួកគេ។

លោក Ruben Salazar Genovez, Global Head of Visa Direct នៃក្រុមហ៊ុន Visa បានមានប្រសាសន៍ថា៖ “ដើម្បីចូលរួមក្នុងសេដ្ឋកិច្ចពិភពលោក Visa បានខិតខំខ្នះខ្នែងបង្កើតមធ្យោបាយបន្ថែមទៀត សម្រាប់បុគ្គល និងម្ចាស់អាជីវកម្មខ្នាតតូច និងមធ្យម (SMBs) ដោយគិតគូរចាប់តាំងពីកម្មករកសិកម្មនៅក្នុងប្រទេសបង់ក្លាដេស​ រហូតដល់អ្នកជំនាញវ័យក្មេងនៅក្នុងទីក្រុងឡុងដ៍ ដែលមានបំណងចង់ផ្ញើប្រាក់ទៅកាន់គ្រួសារនៅក្រៅប្រទេស​”។  លោកបានបន្តទៀតថា៖ “យើងមានសេចក្តីសោមនស្សរីករាយ ដែលបានសហការជាមួយក្រុមហ៊ុន Thunes ដើម្បីផ្តល់ភាពងាយស្រួល និងរហ័ស ដល់អតិថិជនដែលប្រើប្រាស់កាបូបឌីជីថល ជាឧបករណ៍ហិរញ្ញវត្ថុចម្បង អាចចូលទៅកាន់ប្រព័ន្ធហិរញ្ញវត្ថុនៅជុំវិញពិភពលោកឲ្យបានកាន់តែច្រើន។”

តាមរយៈកិច្ចសហការនេះ វេទិកាទូទាត់ប្រាក់របស់ក្រុមហ៊ុន Thunes’ B2B នឹងភ្ជាប់ទៅសេវាផ្ទេរប្រាក់ Visa Direct ដោយបន្ថែមសមត្ថភាពផ្តល់ជូនដំណោះស្រាយទូទាត់អាជីវកម្មឆ្លងប្រទេស ​តាមរយៈការផ្ញើប្រាក់ទៅកាន់កាបូបឌីជីថល (cross-border send-to-wallet ) ចំនួន ៧៨ ប្រភេទ ដែលបានធ្វើសមាហ័រណជាមួយនឹងក្រុមហ៊ុន Thunes រួចហើយ។ តាមរយៈសមាហរណកម្មដ៏សាមញ្ញរបស់សេវា Visa Direct ស្ថាប័នហិរញ្ញវត្ថុ រដ្ឋាភិបាល ធនាគារ neobank រួមទាំងប្រតិបត្តិករផ្ញើប្រាក់ទាំងអស់ អាចប្រើប្រាស់មុខងារថ្មីនេះ ដើម្បីផ្តល់ឱ្យអ្នកប្រើប្រាស់ និងអាជីវកម្មខ្នាតតូច អាចផ្ញើប្រាក់ទៅកាន់ទីផ្សារទូទាំងទ្វីបអាហ្រ្វិក អាស៊ី និងអាមេរិកឡាទីន ដែលអតិថិជនទីនោះជ្រើសរើសប្រើវិធី  សាស្ត្រទូទាត់តាមរយៈការប្រើប្រាស់កាបូបឌីជីថល។

សេវា​ផ្ទេរប្រាក់ Visa Direct ផ្តល់ជូនស្ថាប័នហិរញ្ញវត្ថុ និងភាគីទីបីដែលមានសិទ្ធិ អាចចូលប្រើប្រាស់បណ្តាញសកលរបស់ Visa ដើម្បីពិនិត្យមើលព័ត៌មាន និងធ្វើការទូទាត់ដោយផ្ទាល់រវាងគណនី Visa កាត។ ការផ្ទេរប្រាក់ទាំងនេះប្រើប្រាស់យន្តការទូទាត់ដែលមានសុវត្ថិភាពខ្ពស់របស់ Visa ដោយធានាបាននូវសុវត្ថិភាព និងភាពរហ័សគ្មានគូប្រៀប។

លោក Peter De Caluwe នាយកប្រតិបត្តិនៃក្រុមហ៊ុន Thunes មានប្រសាសន៍ថា៖ "យើងពិតជារំភើបណាស់ នៅក្នុងចំណោមក្រុមហ៊ុនទូទាត់ប្រាក់ទាំងអស់ ក្រុមហ៊ុន Visa ដែលជាក្រុមហ៊ុនបច្ចេកវិទ្យាទូទាត់សាច់ប្រាក់តាមប្រព័ន្ធឌីជីថល​ឈានមុខគេ​នៅក្នុង​ពិភពលោក បាននឹងកំពុងធ្វើការជាមួយ Thunes ក្នុងការដាក់ឲ្យដំណើរការនូវកម្មវិធីមួយនេះ។ តាមរយៈការរួមបញ្ចូលគ្នានូវហេដ្ឋារចនាសម្ព័ន្ធនៃការទូទាត់របស់ Visa និង Thunes កិច្ចសហការមួយនេះ មានសក្តានុពលក្នុងការជួយអភិវឌ្ឍយុគសម័យថ្មីសម្រាប់បរិយាបន្ននៃការទូទាត់ នឹងអាចដំណើរការបានជាសកល"។

បន្ថែមជាមួយកាបូបឌីជីថលចំនួន ១.៥ ពាន់លាន បច្ចុប្បន្នសេវា​ផ្ទេរប្រាក់ Visa Direct សម្រួលដល់ការចូលប្រើកាត រហូតដល់ជិត ៧ ពាន់លាន ការរួមបញ្ចូលគ្នារវាងគណនី និងកាបូបឌីជីថល នៅទូទាំងជាង ១៩០ ភូមិសាស្ត្រ គាំទ្រ ១៦០ រូបិយប័ណ្ណ ភ្ជាប់ទៅបណ្តាញដែលមានមូលដ្ឋានលើកាត (card-based networks) ចំនួន ១៦ គ្រោងការណ៍ទូទាត់ប្រាក់ស្វ័យប្រវត្តិក្នុងស្រុក (ACH) ចំនួន ៦៦ បណ្តាញ ទូទាត់តាមពេលវេលាជាក់ស្តែង (Real-Time Payment (RTP) ចំនួន ១១ បណ្តាញ និងច្រកទូទាត់ (payment gateways) ចំនួន៥។

 

¹ https://www.khmertimeskh.com/501166339/cambodias-trade-reach-41-billion-increase-of-18-percent-in-first-9-months/?p=1166339  - (t.ly/6gD8)

² $1.27 bn remittances received, 0.22 paid in 2020

³ ការសិក្សារបស់ក្រុមហ៊ុន Visa ស្តីពីឥរិយាបទទូទាត់ប្រាក់របស់អតិថិជន ធ្វើឡើងដោយក្រុមហ៊ុន CLEAR ចាប់ពីខែសីហា រហូតដល់ខែ កញ្ញា ឆ្នាំ ២០២១ ដែលត្រូវបានស្ទង់មតិក្នុងចំណោមអ្នកប្រើប្រាស់ ចំនួន ៦,៥២០នាក់ ក្នុងចំណោមប្រទេសក្នុងតំបន់អាស៊ីអាគ្នេយ៍ រួមទាំង ប្រទេសកម្ពុជាផងដែរ។ ដើម្បីង្កើតនូវភាពចម្រុះនៃអាយុ និងភេទ ការសិក្សានេះ បានចុះធ្វើការស្ទង់មតិដោយផ្ទាល់ជាមួយអ្នកប្រើប្រាស់កម្ពុជាចំនួន ៥២០នាក់ នៅទូទាំងប្រទេស ដែលកំពុងធ្វើការក្រៅម៉ោង និងពេញម៉ោង។

 

អំពីក្រុមហ៊ុន Visa Inc.

ក្រុមហ៊ុន Visa គឺជាក្រុមហ៊ុននាំមុខគេក្នុងបច្ចេកវិទ្យាទូទាត់សាច់ប្រាក់តាមរយៈឌីជីថល ដែលជួយសម្រួលដល់ប្រតិបត្តិការរវាងអ្នកប្រើប្រាស់ ពាណិជ្ជករ ស្ថាប័នហិរញ្ញវត្ថុ និងស្ថាប័នរដ្ឋាភិបាលដែលពាក់ព័ន្ធ ច្រើនជាង 200 ប្រទេស និង តំបន់ ជារៀងរាល់ឆ្នាំ។ បេសកកម្មរបស់យើងគឺផ្សាភ្ជាប់ពិភពលោកទាំងមូល តាមរយៈការតភ្ជាប់បណ្តាញទូទាត់ប្រាក់ប្រកបដោយភាពច្នៃប្រឌិតថ្មី ងាយស្រួល អាចទុកចិត្តបាន និងមានសុវត្ថិភាពបំផុត ដែលអនុញ្ញាតឲ្យអ្នកប្រើប្រាស់ អាជីវករ និង​សេដ្ឋកិច្ចមានការរីកចម្រើន។ យើងជឿជាក់ថាសេដ្ឋកិច្ចដែលរួមបញ្ចូលមនុស្សគ្រប់រូប នៅគ្រប់តំបន់ នឹងជួយដល់ការអភិវឌ្ឍនៅគ្រប់ទីកន្លែង ហើយយើងមើលឃើញថា នេះគឺជាមូលដ្ឋានគ្រឹះនៃចរន្តសាច់ប្រាក់។ ស្វែងយល់បន្ថែមតាមរយៈ Visa.com ៕

អំពីក្រុមហ៊ុន Thunes

បង្កើតឡើងក្នុងឆ្នាំ ២០១៦ Thunes គឺជាក្រុមហ៊ុន B2B ដែលមានសម្ថទ្ធភាពដ៏អស្ចារ្យក្នុងការទូទាត់ប្រាក់សម្រាប់អាជីវកម្មដែលរីកលូតលាស់លឿនបំផុតរបស់ពិភពលោក - ពីក្រុមហ៊ុនយក្ស Gig Economy ដូចជា Uber និង Deliveroo និងកម្មវិធី Grab របស់អាស៊ីអាគ្នេយ៍រហូតដល់អ្នកដឹកនាំ Fintech ទូទាំងពិភពលោកដូចជា PayPal និង Remitly ។ តាមរយៈការតភ្ជាប់ដ៏សាមញ្ញតែមួយ អ្នកប្រើប្រាស់ និងអាជីវក អាចផ្ញើការទូទាត់ – និងទទួលការទូទាត់ – នៅគ្រប់ជ្រុងនៃពិភពលោក។ បច្ចុប្បន្ននេះ Thunes គាំទ្ររូបិយប័ណ្ណចំនួន ៧៩ ប្រភេទ ទទួលការទូទាត់ប្រាក់ទៅកាន់ប្រទេសចំនួន ១៣០ និងទទួលយកការទូទាត់ប្រាក់ រហូតដល់ ៣០០ វិធីសាស្ត្រ។ នៅខែមេសា ឆ្នាំ ២០២២ Thunes បានទិញភាគហ៊ុនគ្រប់គ្រងនៅក្នុងក្រុមហ៊ុនឈានមុខគេ AML និងក្រុមហ៊ុនវេទិកាអនុលោមភាព Tookitaki ដែលបច្ចុប្បន្ន ក្រុមហ៊ុនបានអនុលោមទៅតាមច្បាប់ស្វ័យទ្រទ្រង់ក្នុងកម្រិតខ្ពស់ សម្រាប់ការប្រឆាំងការក្លែងបន្លំ និងប្រឆាំងទៅនឹងការលាងលុយកខ្វក់ (AML) ដែលកំណត់តាមស្តង់ដារអន្តរជាតិ។ ក្រុមហ៊ុននេះមានទីស្នាក់ការកណ្តាលនៅប្រទេសសិង្ហបុរី និងការិយាល័យក្នុងតំបន់នៅទីក្រុងឡុងដ៍ ប៉ារីស សៀងហៃ ញូវយ៉ក ឌូបៃ ណៃរ៉ូប៊ី អារីហ្សូណា និងបាសេឡូណា។ សម្រាប់ព័ត៌មានបន្ថែម សូមចូលទៅកាន់គេហទំព័រ www.thunes.com ៕